دہلی:۔ سنٹرل بورڈآف سیکنڈری ایجوکیشن (سی بی ایس ای)نے دسویں جماعت کے امتحانات کے نمبروں کے جمع کرنے اور ٹیبلٹ کرنے اور بورڈ کو بھیجنے کی آخری تاریخ میں 30 جون تک توسیع کردی ہے۔ عہدیداروں نے یہ اطلاع منگل کو دی ہے۔سی بی ایس ای نے پہلے اعلان کیا تھا کہ وہ 11 جون تک نمبروں کا پورا عمل مکمل کردے گی اور 20 جون تک نتائج کا اعلان کردیاجائے گا۔تاہم کوویڈ 19 میں وبا کی موجودہ حالت اور متعدد ریاستوں میں لاک ڈاؤن نافذ ہونے کی وجہ سے اساتذہ اور عملے کی حفاظت کو مدنظر رکھتے ہوئے آخری تاریخ میں توسیع کرنے کا فیصلہ کیا گیا ہے۔سی بی ایس ای کے امتحانات کے کنٹرولر بھاردواج نے کہاہے کہ سی بی ایس ای اساتذہ کی حفاظت اور صحت کو اولین ترجیح دیتی ہے۔ کچھ ریاستوں میں وبا کی حالت اور لاک ڈاؤن اور اس سے منسلک اسکولوں کے اساتذہ اور عملے کی حفاظت کو مدنظررکھتے ہوئے بورڈ نے تاریخوں میں مزید توسیع کا فیصلہ کیاہے۔انہوں نے کہا ہے کہ نمبرات بورڈکو جون تک بھیجے جائیں گے۔ نتائج کمیٹی سی بی ایس ای پلان کی بنیاد پر اپنے شیڈول کا فیصلہ کرسکتی ہے۔اہم بات یہ ہے کہ سی بی ایس ای نے رواں ماہ کے شروع میں دسویں بورڈ کے منسوخ ہونے والے امتحان کے سلسلے میں نمبروں کے حساب کتاب کا ایک فارمولاپیش کیا تھا۔ یہ امتحان ملک میں کوویڈ 19 میں وبا کی حالت کو مدنظر رکھتے ہوئے منسوخ کردیا گیا تھا۔اس فارمولے کے تحت ہر مضمون میں 20 نمبرات داخلی امتحان کے ہوں گے اور سال کے دوران کلاس میں مختلف امتحانات یا امتحانات میں طالب علم کی طرف سے حاصل کردہ نمبروں کی بنیاد پر 80 نمبروں کاحساب لگایا جائے گا۔بورڈ نے اسکولوں سے کہاتھا کہ وہ ایک نتیجہ کمیٹی تشکیل دیں جس میں پرنسپل اور سات اساتذہ شامل ہوں گے تاکہ نمبروں کو حتمی شکل دی جاسکے۔ اسکول میں ریاضی ، سوشل سائنس ، سائنس اور دو زبانوں میں پانچ اساتذہ ہوں گے اور دو اساتذہ پڑوسی اسکول سے اس کمیٹی میں بیرونی ممبرکی حیثیت سے ہوں گے۔اہم بات یہ ہے کہ 14 اپریل کو سی بی ایس ای نے دسویں بورڈ کا امتحان منسوخ کرنے اور 12 ویں بورڈ کا امتحان ملتوی کرنے کا فیصلہ کیا تھا۔ وزیر اعظم نریندر مودی کے زیرصدارت اجلاس میں اس کا فیصلہ کیا گیاہے۔
