دہلی:۔ بالی ووڈ اداکارہ کنگنا رناوت کے خلاف سپریم کورٹ میں درخواست دائر کر دی گئی ہے۔ درخواست میں کنگنا رناوت کی تمام سوشل میڈیا پوسٹس کو سنسر کرنے کا مطالبہ کیا گیا ہے۔ درخواست میں درخواست گزار نے کہا ہے کہ انہیں کنگنا رناوت کی انسٹاگرام پوسٹ سے شدید دکھ ہوا ہے جس میں اداکارہ نے سکھ کسانوں کو خالصتانی دہشت گرد قرار دیا ہے۔ یہ درخواست سپریم کورٹ کے وکیل چرنجیت سنگھ چندرپال نے دائر کی ہے۔درخواست میں کہا گیا ہے کہ رناوت کے بیانات کا مقصد فساد بھڑکانا اور مذہبی جذبات کو ٹھیس پہنچانا ہے۔ چندرپال نے درخواست میں کہا ہے کہ کنگنا کی پوسٹس سکھوں کو مکمل طور پر ملک مخالف انداز میں پیش کرتی ہیں۔انہوں نے کہا ہے کہ کنگنا رناوت کا تبصرہ ملک کے اتحاد کے خلاف ہے اور اداکارہ قانون کے مطابق سخت سزا کی مستحق ہیں۔ وکیل نے کہا ہے کہ اداکارہ کے اقدامات کو نہ تو جھٹلایا جا سکتا ہے اور نہ ہی معاف کیا جا سکتا ہے۔ درخواست میں کنگنا رناوت کے خلاف ہندوستان بھر میں درج تمام زیر التواء ایف آئی آر کو ممبئی کے کھار پولیس اسٹیشن منتقل کرنے کا بھی مطالبہ کیا گیا ہے۔درخواست میں سپریم کورٹ سے ان مقدمات کی تمام چارج شیٹ چھ ماہ میں داخل کرنے اور دو سال میں ٹرائل مکمل کرنے کی ہدایت بھی مانگی گئی ہے۔یہ الزام ہے کہ کنگنا رناوت نے جان بوجھ کر کسانوں کے احتجاج (کسان مورچہ) کو خالصتانی تحریک کے طور پر پیش کیا۔ اس کے علاوہ انہوں نے مبینہ طور پر سکھ برادری کو خالصتانی دہشت گرد بھی قرار دیا تھا۔ اپنی پوسٹ میں انہوں نے 1984 اور اس سے پہلے کے قتل عام کو اس وقت کی وزیر اعظم اندرا گاندھی کی ایک سوچی سمجھی سازش قرار دیا تھا۔
