دہلی:۔ انفورسمنٹ ڈائریکٹوریٹ (ای ڈی) نے کانگریس کی عبوری صدر سونیا گاندھی اور راہل گاندھی کو طلب کیا ہے۔ ایجنسی نے دونوں رہنماؤں سے کہا ہے کہ وہ نیشنل ہیرالڈ کیس کی تحقیقات میں شامل ہوں۔ اس معاملہ میں ای ڈی نے 12 اپریل 2014 کو کانگریس کے دو بڑے لیڈر پون بنسل اور ملک ارجن کھڑگے کو جانچ میں شامل کیا تھا، سبرامنیم سوامی نے سونیا اور راہل گاندھی کیخلاف مقدمہ درج کیا تھا۔ اس میںسبرامنیم سوامی نے گاندھی خاندان پر 55 کروڑ کے غلط استعمال کا الزام لگایا تھا۔کانگریس نے نوٹس کے معاملے پر مرکزی حکومت پر حملہ کیا ہے۔ ترجمان رندیپ سرجے والا نے کہا کہ آمرانہ حکومت خوفزدہ ہے، اس لیے بدلہ لیا جا رہا ہے۔انہوں نے کہا کہ حکومت انتقام کے جذبے میں اندھی ہو چکی ہے۔خیال رہے کہ سبرامنیم سوامی نے 2012 میں الزام لگایا تھا کہ کانگریس نے پارٹی فنڈز سے راہل اور سونیا کو 90 کروڑ روپے دیئے تھے۔ اس کا مقصد ایسوسی ایٹ جرنلز کے 2 ہزار کروڑ کے اثاثوں کو حاصل کرنا تھا۔اس کے لیے گاندھی خاندان نے صرف 50 لاکھ روپے کی معمولی رقم دی تھی۔ 1938 میں کانگریس پارٹی نے ایسوسی ایٹ جرنلز لمیٹڈ تشکیل دیا۔اسی کے تحت نیشنل ہیرالڈ اخبار نکالا گیا۔ اے جے ایل پر 90 کروڑ سے زیادہ کا قرض تھا اور اسے ختم کرنے کے لیے ایک اور کمپنی بنائی گئی۔ جس کا نام ینگ انڈیا لمیٹڈ تھا۔اس میں راہل اور سونیا کا حصہ 38-38% تھا۔اے جے ایل کے 9 کروڑ شیئر ینگ انڈیا کو دیئے گئے۔اس کے بدلے میں ینگ انڈیا اے جے ایل کی واجبات ادا کرے گا۔تاہم زیادہ شیئر ہولڈنگ کی وجہ سے ینگ انڈیا کا مالک بن گیا۔ اے جے ایل کی ذمہ داریوں کو پورا کرنے کے لیے کانگریس نے 90 کروڑ کا قرض دیا ،وہ بھی بعد میں معاف کر دیا گیا۔یکم نومبر 2012 کو سبرامنیم سوامی نے دہلی کی عدالت میں ایک مقدمہ دائر کیاتھا، جس میں سونیا-راہل کے علاوہ موتی لال بورا، آسکر فرنانڈیز، سمن دوبے اور سیم پترودا کو ملزم بنایا گیا تھا۔ 26 جون 2014 کو میٹروپولیٹن مجسٹریٹ نے سونیا-راہل سمیت تمام ملزمان کے خلاف سمن جاری کیا۔یکم اگست 2014 کو ای ڈی نے معاملہ کا نوٹس لیا اور منی لانڈرنگ کا مقدمہ درج کیا۔ مئی 2019 میں ای ڈی نے اس کیس سے متعلق 64 کروڑ کے اثاثوں کو ضبط کیا۔ 19 دسمبر 2015 کو دہلی پٹیالہ کورٹ نے اس معاملے میں سونیا، راہل سمیت تمام ملزمان کو ضمانت دے دی۔ 9 ستمبر 2018 کو دہلی ہائی کورٹ نے اس معاملہ میں سونیا اور راہل کو جھٹکا دیا۔ عدالت نے محکمہ انکم ٹیکس کے نوٹس کیخلاف درخواست کو خارج کر دیا تھا۔ کانگریس نے اسے سپریم کورٹ میں بھی چیلنج کیا، لیکن 4 دسمبر 2018 کو عدالت نے کہا کہ انکم ٹیکس کی تحقیقات جاری رہے گی،تاہم اگلی سماعت تک کوئی حکم جاری نہیں کیا جائیگا۔
