دہلی:۔سپریم کورٹ نے سماجوادی پارٹی کےقدآور رہنما محمداعظم خان کو اپنے آبائی شہر رام پور جانے سے روکنے کا حکم دینے کے لئے اتر پردیش حکومت کی اپیل کو مسترد کر دیا ہے۔اب ایس پی لیڈر اعظم خان اپنےآبائی شہر رام پور جا سکتے ہیں۔اس سے قبل سپریم کورٹ نے نچلی عدالت کو جیل میں بند اعظم خان کو ضمانت دینے کا حکم دیا تھا۔ اس کے ساتھ ہی یوپی حکومت کو جوہر یونیورسٹی کے قریب کی زمین کو فوری طور پر ڈی سیل کرنے کے احکامات دیے گئے ہیں۔عدالت نے اعظم خان کی باقاعدہ ضمانت بھی منظور کر لی۔ سپریم کورٹ نےالہ آباد ہائی کورٹ کی شرط کو ہٹا دیا تھا، جس نے انتظامیہ سے کہا تھا کہ مبینہ طور پر زیر قبضہ 13 ایکڑ زمین ضمانت کے طور پر دی جائے۔جسٹس اے ایم کھانولکر کی بنچ نے کہا کہ ایک نیا رجحان سامنے آیا ہے، جہاں ہمیں بار بار ایسے احکامات مل رہے ہیں۔ ضمانت کی ایسی شرائط عدالتیں عائد کرتی ہیں جن کا کیس کے حقائق سے کوئی تعلق نہیں۔ اس حکم میں بھی ہائی کورٹ نے ایسے معاملے کا ذکر کیا ہے جس کا ضمانت کی عرضی سےمکمل طور پر کوئی تعلق نہیں ہے۔اس سے پہلے سپریم کورٹ نےاعظم خان کو یوپی حکومت کے خلاف توہین عدالت کا مقدمہ دائر کرنے سے استثنیٰ دیا تھا۔ اعظم نے عدالت کے عبوری اسٹے کے باوجود حکومت پر کارروائی کرنے کا الزام لگایا تھا۔ اعظم خان نے عدالت کو بتایا تھا کہ سپریم کورٹ کے حکم امتناعی کے بعد بھی جوہر یونیورسٹی کے قریب زمین پر کارروائی کی گئی۔ یونیورسٹی کی باڑ کی تار کاٹ کر یونیورسٹی کو کام کرنے سے روک دیا گیا۔اعظم خان کی جانب سے عدالت میں پیش ہونے والے وکیل کپل سبل نے کہا تھا کہ عدالت نے ہائی کورٹ کے حکم پر عبوری روک لگانے کے بعد بھی انتظامیہ نے کارروائی کی۔ وکیل کپل سبل نے کہا کہ وہ اس معاملے میں توہین عدالت کی درخواست دائر کریں گے۔جسٹس اے ایم کھانولکر نے کہا کہ توہین عدالت کی درخواست دائر کرنے کی آزادی دی گئی ہے۔ اعظم خان کی درخواست پر سپریم کورٹ میں سماعت میں اتر پردیش حکومت نے جواب داخل کرنے کے لیے وقت مانگا تھا۔ اس سے پہلے 27 مئی2022 کو ایس پی لیڈر اعظم خان اور یونیورسٹی کو سپریم کورٹ سے بڑی راحت ملی تھی۔
