از:۔ڈاکٹر نفیس فاطمہ اے ایچ،لکچرر، جامعہ کوئمپو مطالعہ و تحقیق، سہیادری کالج کیمپس، شیموگہ
آج کی دنیا’’گلوبل ویلج‘‘کا روپ دھار چکی ہے جہاں فاصلے سمٹ گئے ہیں اور سرحدوں کی سختیاں نرم پڑ گئی ہیں۔ ذرائع ابلاغ، سائنسی ایجادات اور جدید ٹیکنالوجی نے انسانوں کو ایک دوسرے سے اس طرح جوڑ دیا ہے کہ دنیا کے ایک کونے میں ہونے والا واقعہ لمحوں میں پوری دنیا پر اثر انداز ہو جاتا ہے۔ ان حالات میں یہ حقیقت سامنے آتی ہے کہ انسان اب محض اپنی قوم، زبان یا مذہب تک محدود نہیں رہا بلکہ وہ عالمی برادری کا حصہ بن چکا ہے۔اس بدلتی ہوئی دنیا میں مختلف مذاہب، تہذیبوں اور قومیتوں کے ماننے والے افراد ایک دوسرے کے قریب آ گئے ہیں۔ لیکن قربت ہمیشہ ہم آہنگی کو جنم نہیں دیتی، کبھی کبھی یہ قربت غلط فہمیوں، تعصبات اور نفرتوں کو بھی بڑھا دیتی ہے۔ یہی وہ لمحہ ہے جب انسانیت کو ایک ایسے اصول کی ضرورت محسوس ہوتی ہے جو اختلافات کو تصادم میں بدلنے کے بجائے ہم آہنگی اور یکجہتی میں ڈھال دے۔ یہ اصول ہے بین المذاہب ہم آہنگی اور پرامن بقائے باہمی۔
اگر ہم چاہتے ہیں کہ یہ دنیا حقیقی معنوں میں سکون، محبت اور امن کا گہوارہ بنے تو ہمیں اپنی اجتماعی زندگی کی بنیاد باہمی احترام، برداشت اور رواداری پر رکھنی ہوگی۔ ہمیں یہ تسلیم کرنا ہوگا کہ مذاہب اور ثقافتوں کی کثرت کوئی کمزوری نہیں بلکہ انسانیت کی خوبصورتی اور رنگا رنگی ہے۔ جس طرح ایک باغ مختلف رنگوں کے پھولوں سے اپنی خوبصورتی قائم رکھتا ہے، اسی طرح دنیا بھی اسی وقت حسین بن سکتی ہے جب اس کے تمام مذاہب اور ثقافتیں امن اور محبت کے ساتھ ساتھ چلیں۔
بین المذاہب ہم آہنگی اور پرامن بقائے باہمی کو صرف ایک اخلاقی فریضہ سمجھ کر نظر انداز کرنا درست نہیں، بلکہ یہ عصرِ حاضر کی سب سے بڑی ضرورت ہے۔ کیوں کہ اگر دنیا کے لوگ ایک دوسرے کے عقائد اور اقدار کا احترام نہیں کریں گے تو یہ ’’گلوبل ویلج‘‘امن کا گہوارہ نہیں بلکہ فساد، کشمکش اور ٹکراؤ کا میدان بن جائے گا۔ لہٰذا اب وقت آگیا ہے کہ ہم اس حقیقت کو سمجھیں کہ انسانی بقا اور عالمی ترقی کا راز اسی اصول میں پوشیدہ ہے۔
بین المذاہب ہم آہنگی کی اہمیت۔
دنیا کے نقشے پر مختلف مذاہب کے پیروکار بستے ہیں۔ اسلام، عیسائیت، یہودیت، ہندو مت، بدھ مت اور دیگر مذاہب صدیوں سے کروڑوں انسانوں کی روحانی اور اخلاقی تربیت کا سرچشمہ رہے ہیں۔ ان کے بنیادی پیغامات میں ایک مشترکہ نکتہ پوشیدہ ہے۔انسانیت کی بھلائی، فلاح، خیر خواہی اور محبت۔ دراصل تمام آسمانی اور غیر آسمانی مذاہب اپنے ماننے والوں کو نفرت اور عداوت سے نہیں بلکہ امن، اخوت اور بھائی چارے سے قریب لاتے ہیں۔ان مذاہب کے ماننے والوں کے درمیان ہم آہنگی قائم کرنا اس لیے ضروری ہے کہ مذہبی تنازعات، شدت پسندی اور انتہا پرستی کی آگ کو بجھایا جا سکے جو نسلِ انسانی کے وجود کے لیے خطرہ بن چکی ہے۔ آج کے دور میں یہ مسائل صرف کسی ایک خطے یا قوم تک محدود نہیں رہے بلکہ پوری دنیا کو اپنی لپیٹ میں لے چکے ہیں۔ اس آگ نے نہ صرف لاکھوں بے گناہ جانوں کو نگل لیا ہے بلکہ انسانی قدریں، امن و سکون، معاشرتی ہم آہنگی اور تہذیبی ورثہ بھی اس کی زد میں آچکا ہے۔ اگر ان رجحانات پر قابو نہ پایا گیا تو انسانیت کی بقا خطرے میں پڑ سکتی ہے۔ لہٰذا لازم ہے کہ مختلف مذاہب اور مکاتبِ فکر کے پیروکار باہمی احترام، رواداری اور مکالمے کو فروغ دیں تاکہ نفرت کی بجائے محبت، تعصب کی بجائے انصاف اور تصادم کی بجائے پرامن بقائے باہمی کی فضا پروان چڑھے۔ یہی وہ واحد راستہ ہے جو موجودہ اور آنے والی نسلوں کو ایک محفوظ، خوشحال اور مہذب دنیا عطا کر سکتا ہے۔
عالمی امن و امان قائم ہو تاکہ دنیا جنگ و جدل کے میدان کے بجائے سکون و آسودگی کا گہوارہ بنے۔ آج کے زمانے میں جب انسان نے سائنسی ترقی اور مادی سہولتوں کے ذریعے کائنات کو مسخر کرنے کا دعویٰ کر لیا ہے، اس کے باوجود جنگیں، دہشت گردی، خون ریزی اور باہمی عداوتیں انسانیت کے وجود کو کمزور کر رہی ہیں۔ اگر دنیا کے افراد و اقوام امن کو اپنی اجتماعی ترجیح بنا لیں تو یہ کرۂ ارض نفرت، دشمنی اور تباہی سے نکل کر محبت، تعاون اور خیرسگالی کا گہوارہ بن سکتا ہے۔ امن و امان کی فضا نہ صرف انسانی جان و مال کو تحفظ بخشتی ہے بلکہ معاشی ترقی، علمی ارتقا، ثقافتی ہم آہنگی اور سماجی بہبود کے دروازے بھی کھولتی ہے۔ جب دلوں سے کینہ و کدورت کا زہر نکل جائے اور اس کی جگہ اخوت، برداشت اور احترامِ انسانیت کا جذبہ پروان چڑھے، تب ہی دنیا حقیقی معنوں میں سکون و آسودگی کی جنت اور تمام انسانوں کیلئے ایک پرامن اور خوشحال مسکن بن سکتی ہے۔
انسانوں کے دلوں میں قربت، اعتماد اور محبت کے رشتے مضبوط ہوں اور وہ ایک دوسرے کو غیریت کی بجائے اپنائیت کی نگاہ سے دیکھیں۔ یہی طرزِ فکر ایک ایسے معاشرے کی بنیاد رکھتا ہے جہاں انسان ایک دوسرے کے دکھ درد میں شریک ہوں، ایک دوسرے کے جذبات و احساسات کا احترام کریں اور ایک دوسرے کی کامیابی کو اپنی کامیابی سمجھیں۔ جب باہمی اعتماد پروان چڑھتا ہے تو معاشرتی تعلقات میں شفافیت، دیانت اور خلوص کے عناصر جنم لیتے ہیں۔ محبت اور اپنائیت کی یہ فضا نہ صرف افراد کے باہمی روابط کو مستحکم کرتی ہے بلکہ قوموں اور تہذیبوں کے درمیان بھی ایک پُل کا کام دیتی ہے۔ اگر انسان ایک دوسرے کو بیگانگی اور نفرت کی نگاہ سے دیکھنے کے بجائے بھائی چارے اور انسانیت کی اساس پر پرکھیں تو دنیا سے تعصبات، ناانصافیاں اور تقسیم کی دیواریں مٹ جائیں۔ اس طرح پوری انسانیت ایک ایسی بستی کا روپ دھار سکتی ہے جہاں ہر دل محبت کا مرکز اور ہر فرد دوسرے کا سہارا ہو۔
ایک دوسرے کے عقائد، اقدار اور انسانی وقار کا احترام پروان چڑھے تاکہ دنیا ایک حسین اور متوازن معاشرہ بن سکے۔ احترامِ انسانیت دراصل وہ بنیاد ہے جس پر امن و محبت کی عمارت کھڑی ہوتی ہے۔ اگر مختلف مذاہب، تہذیبوں اور معاشرتی طبقات کے لوگ ایک دوسرے کے عقائد و روایات کو تسلیم کریں اور ان کے تقدس کا پاس رکھیں تو باہمی نفرت، تعصب اور کدورت کی دیواریں خود بخود گر جائیں گی۔ جب انسانی وقار کو اولین ترجیح دی جائے اور ہر شخص کو اس کی ذات، عقیدے یا پس منظر سے قطع نظر برابر کا انسان سمجھا جائے تو معاشرہ انصاف، مساوات اور رواداری کا نمونہ بن سکتا ہے۔ ایسی فضا میں نہ صرف فکری ہم آہنگی اور روحانی سکون کو فروغ ملتا ہے بلکہ مختلف قوموں اور نسلوں کے درمیان اعتماد، تعاون اور بھائی چارے کے رشتے بھی مضبوط ہوتے ہیں۔ بالآخر یہی احترام اور رواداری دنیا کو ایک ایسا حسین اور متوازن معاشرہ عطا کر سکتے ہیں جہاں امن، خوشی اور انسان دوستی کے چراغ ہمیشہ روشن رہیں۔
یہ حقیقت ناقابلِ انکار ہے کہ مذہب کا اصل مقصد انسانوں کو قریب لانا ہے، نہ کہ انہیں تفرقے اور دشمنی کے دائرے میں دھکیلنا۔ مذہب دراصل روشنی کا وہ چراغ ہے جو نفرت کی تاریکی کو ختم کر کے دلوں میں محبت کی حرارت جگاتا ہے۔ اگر ہم مذاہب کے بنیادی فلسفے پر غور کریں تو یہ حقیقت آشکار ہوتی ہے کہ سب مذاہب انسان کو انسان سے جوڑنے کا پیغام دیتے ہیں۔چنانچہ مذہبی ہم آہنگی کا فروغ ہی حقیقی امن کی بنیاد ہے۔ یہ ایسا پھول ہے جس کی خوشبو سرحدوں سے ماورا ہو کر پورے عالم کو مہکا سکتی ہے۔ جب مختلف مذاہب کے پیروکار ایک دوسرے کے ساتھ رواداری اور احترام کے ساتھ زندگی گزاریں گے تو دنیا کا ہر گوشہ سکون، محبت اور بھائی چارے سے روشن ہو جائیگا۔
پرامن بقائے باہمی کی ضرورت۔
پرامن بقائے باہمی دراصل ایک ایسا عظیم الشان تصور ہے جو انسانیت کے دلوں کو جوڑنے اور معاشرتی زندگی کو ہم آہنگی کے رنگوں سے مزین کرنے کا پیغام دیتا ہے۔ اس کے معنی یہ ہیں کہ مختلف مذاہب، تہذیبوں اور قومیتوں سے وابستہ انسان رواداری، ایثار، تعاون اور باہمی احترام کے ساتھ زندگی بسر کریں۔ یہ محض ایک اخلاقی نعرہ نہیں بلکہ عصرِ حاضر کی وہ بنیادی ضرورت ہے جس کے بغیر انسانی معاشرت اپنی بقا کھو بیٹھتی ہے۔ دنیا کی وسعتوں میں موجود کثرتِ مذاہب اور تنوعِ اقوام ایک ایسی حقیقت ہے جسے جھٹلایا نہیں جا سکتا۔ اگر اس تنوع کو تسلیم نہ کیا جائے اور دوسروں کی اقدار کو برداشت نہ کیا جائے تو امن کے چراغ بجھ جاتے ہیں اور معاشرتی زندگی اندھیروں میں ڈوب جاتی ہے۔ترقی، خوشحالی اور سماجی استحکام اس وقت ہی ممکن ہے جب معاشرہ سکون، اطمینان اور باہمی ہم آہنگی سے سرشار ہو۔ جب قومیں ایک دوسرے کے عقائد و افکار کو احترام کی نگاہ سے دیکھتی ہیں تو دلوں میں اعتماد کی فصل لہلہاتی ہے اور یہی اعتماد اقوام کی ترقی و کامرانی کا زینہ بنتا ہے۔ اس کے برعکس، عدم برداشت اور نفرت کے شعلے انسانیت کو جنگوں، خونریزی اور تباہی کی بھٹی میں جھونک دیتے ہیں۔ تاریخ گواہ ہے کہ جب بھی تعصب اور نفرت کو ہوا دی گئی، تہذیبیں مٹ گئیں اور انسانیت ندامت کے داغوں میں لپٹ کر رہ گئی۔ موجودہ دور میں جب دنیا سکڑ کر ایک گاؤں کی مانند بن چکی ہے، فاصلے سمٹ گئے ہیں اور علم و فکر، معیشت و ٹیکنالوجی کی کرنیں ہر گوشے تک پھیل چکی ہیں، ایسے میں باہمی تعاون اور اشتراکِ عمل کی اہمیت کہیں زیادہ بڑھ گئی ہے۔ اب کوئی قوم تنہا اپنی تقدیر نہیں سنوار سکتی، بلکہ سب کو مل جل کر آگے بڑھنا ہوگا۔ یہی باہمی تعاون اور احترامِ انسانیت ایک ایسا سنہرا پل ہے جو دنیا کو پرامن، خوشحال اور متوازن مستقبل سے ہمکنار کرتا ہے۔ یہی وہ روشنی ہے جو تاریکیوں کو مٹا کر انسانیت کے سفر کو ابدی سکون اور آسودگی عطا کر سکتی ہے۔
اسلام کا نقطۂ نظر۔
اسلام ایک ایسا دین ہے جو انسانیت کے ہر گوشے کو اپنے آغوشِ رحمت میں سمیٹے ہوئے ہے۔ اس کی تعلیمات میں بین المذاہب ہم آہنگی، رواداری اور پرامن بقائے باہمی کو نہایت اہم مقام حاصل ہے۔ قرآنِ مجید کی آیات ہمیں یہ سبق دیتی ہیں کہ اختلافِ مذہب اور رنگ و نسل کے باوجود تمام انسان ایک ہی رب کی مخلوق ہیں اور ان کے ساتھ انصاف، حسنِ سلوک اور خیرخواہی کا برتاؤ کرنا مومن کی پہچان ہے۔ اللہ تعالیٰ کا ارشاد ہے
لَا يَنْهَاكُمُ اللّٰهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُم مِّن دِيَارِكُمْ أَنْ تَبَرُّوهُمْ وَتُقْسِطُوا إِلَيْهِم(الممتحنة8)
یعنی جو لوگ تم سے دین کے معاملے میں جنگ نہیں کرتے اور تمہیں تمہارے گھروں سے نہیں نکالتے، اللہ تمہیں ان کے ساتھ نیکی کرنے اور انصاف کرنے سے نہیں روکتا۔ یہ آیت اسلام کی وسعتِ ظرفی اور رواداری کی روشن دلیل ہے۔
حضور نبی کریم ﷺ کی حیاتِ طیبہ بھی ہمیں یہی درس دیتی ہے ۔ جب آپ ﷺ مدینہ تشریف لائے تو وہاں مختلف مذاہب اور قبائل آباد تھے۔ آپ ﷺ نے’’میثاقِ مدینہ‘‘ کے ذریعے ایک ایسا معاہدہ ترتیب دیا جو دنیا کی پہلی بین المذاہب اور بین القبائلی ریاستی دستاویز قرار دیا جا سکتا ہے۔ اس معاہدے میں یہودیوں، عیسائیوں اور دیگر قبائل کو مکمل مذہبی آزادی اور تحفظ فراہم کیا گیا۔ یہ اس بات کا عملی ثبوت ہے کہ اسلام دوسروں کے ساتھ پرامن بقائے باہمی کو نہ صرف تسلیم کرتا ہے بلکہ اسے ریاستی سطح پر نافذ کرنے کی ترغیب بھی دیتا ہے۔
تاریخِ اسلام میں غیر مسلموں کے ساتھ حسنِ سلوک اور اعتماد کی بے شمار مثالیں ملتی ہیں۔ تجارت میں دیانت داری، وعدوں میں پختگی اور صلح میں انصاف ہمیشہ مسلمانوں کی پہچان رہے۔ آپ ﷺ نے نہ صرف مسلمانوں کو بلکہ غیر مسلموں کو بھی برابر کا انسان سمجھا اور ان کے ساتھ عدل و مساوات کا سلوک کیا۔ جب مکہ کے لوگ، جو برسوں تک آپ ﷺ کے بدترین دشمن رہے ، فتح مکہ کے موقع پر آپ کے سامنے بے بس کھڑے تھے تو آپ ﷺ نے نہ انتقام لیا اور نہ ہی سخت رویہ اپنایا بلکہ ارشاد فرمایا۔
’’جاؤ، آج تم پر کوئی گرفت نہیں، تم سب آزاد ہو‘‘۔
یہ عظیم مثال انسانیت کے لیے تا قیامت ایک روشن مینار ہے کہ حقیقی طاقت درگزر، محبت اور امن قائم کرنے میں ہے۔
اسلام کا پیغام یہ ہے کہ انسانیت کو تلوار سے نہیں بلکہ کردار کی روشنی سے جیتا جائے۔ یہی وجہ ہے کہ صدیوں تک مسلمان جہاں بھی گئے، وہاں کے لوگ اسلام کی اصل روح یعنی عدل، رحمت اور محبت سے متاثر ہو کر اس دین میں داخل ہوئے۔ اسلام ہمیں یہ سکھاتا ہے کہ اختلاف کوئی عیب نہیں بلکہ انسانی معاشرت کا حسن ہے اور اس اختلاف کے باوجود اگر ہم باہمی احترام، انصاف اور رواداری کو اپنائیں تو دنیا ایک ایسا گلشن بن سکتی ہے جس میں امن کے پھول اور محبت کی خوشبو ہر سمت پھیلے۔
عملی اقدامات۔
بین المذاہب ہم آہنگی اور پرامن بقائے باہمی کو حقیقت بنانے کے لیے چند عملی اقدامات نہایت ضروری ہیں۔
(1) نظامِ تعلیم میں برداشت، رواداری، اخلاقیات اور باہمی احترام کو شامل کیا جائے۔
(2) مذاہب کے رہنماؤں کے درمیان مکالمے، کانفرنسیں اور بامقصد نشستوں کا انعقاد کیا جائے تاکہ غلط فہمیاں کم ہوں۔
(3)میڈیا اور سوشل پلیٹ فارمز کو نفرت پھیلانے کے بجائے امن، محبت اور بھائی چارے کا پیغام عام کرنے کا ذریعہ بنایا جائے۔
(4)حکومتی اور عالمی سطح پر ایسی پالیسی سازی ہو جو انسانی مساوات، مذہبی آزادی اور بنیادی حقوق کو یقینی بنائے۔
(5)گھریلو اور سماجی تربیت کے ذریعے بچوں اور نوجوانوں کو اختلافات کو برداشت کرنے اور دوسروں کے عقائد کا احترام
کرنے کی عادت ڈالی جائے۔
بین المذاہب ہم آہنگی اور پرامن بقائے باہمی محض خوشنما نعرے یا خیالی تصورات نہیں بلکہ وہ اساس ہیں جن پر انسانیت کی حقیقی بقا اور تہذیبوں کی پائیدار ترقی قائم ہے۔ موجودہ دور میں جب دنیا دہشت گردی، شدت پسندی، انتہا پرستی اور تعصبات کے مہیب سائے میں لپٹی ہوئی ہے، انسانیت کو امن اور سکون کی جستجو پہلے سے کہیں زیادہ درکار ہے۔ اگر ہم چاہتے ہیں کہ دنیا جنگوں اور خونریزی سے محفوظ رہے اور انسان اپنے حقیقی مقام کو پا سکے تو لازم ہے کہ ہم مذہبی و ثقافتی اختلافات کو دشمنی کا ذریعہ بنانے کے بجائے انہیں باہمی مکالمے، تعاون اور محبت کے پل میں ڈھالیں۔ یہی رویہ دلوں کو قریب کرتا ہے، فاصلے مٹاتا ہے اور نفرتوں کو دوستیوں میں بدل دیتا ہے۔
انسانی تاریخ اس حقیقت کی شاہد ہے کہ وہی معاشرے اور تہذیبیں استحکام اور خوشحالی سے ہمکنار ہوئیں جنہوں نے رواداری اور برداشت کو اپنی بنیاد بنایا۔ جن قوموں نے تعصب اور تنگ نظری کو فروغ دیا وہ نہ صرف باہمی انتشار کا شکار ہوئیں بلکہ دنیا کی تاریخ کے صفحات سے بھی مٹ گئیں۔ آج کی تیز رفتار اور باہم جڑی ہوئی دنیا میں یہ حقیقت اور بھی نمایاں ہو گئی ہے کہ معاشرتی سکون، اقتصادی ترقی اور فکری ارتقا اسی وقت ممکن ہے جب مختلف مذاہب اور قومیتوں کے لوگ ایک دوسرے کے وجود کو تسلیم کریں اور مشترکہ انسانی قدروں کو اپنی زندگی کا محور بنائیں۔
عصرِ حاضر کی علمی، سائنسی اور معاشی ترقی کا پہلا تقاضا یہی ہے کہ دنیا کے مختلف خطوں کے لوگ اشتراکِ عمل کے ذریعے آگے بڑھیں۔ آج کی گلوبل دنیا میں کوئی ملک یا قوم تنہا ترقی نہیں کر سکتی۔ علم و ہنر، ٹیکنالوجی اور معیشت کے نئے در وا کرنےکیلئے ضروری ہے کہ ہم تعصبات کو پسِ پشت ڈال کر تعاون اور ہم آہنگی کو اپنائیں۔ یہ ہم آہنگی نہ صرف عالمی امن کی ضمانت ہے بلکہ معاشی خوشحالی اور سماجی استحکام کا راستہ بھی ہموار کرتی ہے۔
عصرِ حاضر کی دنیا ایک ایسے نازک موڑ پر کھڑی ہے جہاں مذہبی تعصبات، انتہا پسندی، جنگ و جدل اور نسلی و لسانی اختلافات انسانیت کے وجود کو خطرے میں ڈال رہے ہیں۔ ایسے حالات میں بین المذاہب ہم آہنگی اور پرامن بقائے باہمی صرف ایک اخلاقی یا نظریاتی قدر نہیں بلکہ بقا اور ترقی کی بنیادی شرط ہے۔ یہ وہ اقدار ہیں جو مختلف مذاہب، تہذیبوں اور قومیتوں کے درمیان رشتۂ اخوت و محبت کو مضبوط بناتی ہیں اور انسان کو انسان کے قریب لاتی ہیں۔ہم آہنگی کا مطلب صرف ایک دوسرے کو برداشت کرنا نہیں بلکہ ایک دوسرے کے مذہبی اور ثقافتی تشخص کو عزت و احترام دینا ہے۔ جب تک دنیا کے باسی اس اصول کو نہیں اپنائیں گے، تب تک امن و سکون محض ایک خواب رہے گا۔ پرامن بقائے باہمی ہی وہ راستہ ہے جو اس کرۂ ارض کو نفرت و عداوت کی آگ سے بچا کر امن و محبت کے گلزار میں بدل سکتا ہے۔ یہی وہ واحد ذریعہ ہے جس کے ذریعے ہر فرد بلا امتیاز مذہب و ملت اپنی زندگی عزت، وقار اور خوشحالی کے ساتھ بسر کرسکتا ہے ۔یوں کہا جا سکتا ہے کہ عصرِ حاضر کے پرآشوب حالات میں بین المذاہب ہم آہنگی اور پرامن بقائے باہمی ایک ایسا عالمی فریضہ ہے جس کے بغیر انسانیت کی ناؤ بھنور میں پھنس جانے کا خدشہ ہے۔ یہی اقدار دنیا کے مختلف خطوں کو ایک دوسرے سے قریب کر کے انسانیت کو بقا، امن اور روشن مستقبل کی ضمانت فراہم کرسکتی ہیں۔
