شیموگہ:۔ اسمبلی انتخابات کا اعلان ہوتے ہی ریاست بھر میں ضابطہ اخلاق بھی جاری کیاجاچکاہے اور ریاست کے ہر علاقے میں چیک پوسٹ بھی لگائے گئے ہیں،اسی طرح سےشیموگہ ضلع پولیس نے شیموگہ ضلع کے مختلف علاقوں میں چیک پوسٹوں پر بغیر دستاویزات کے لے جانے والے کروڑوں روپے کی نقدی برآمد کی ہے۔شیموگہ کے ٹنگا نگراسٹیشن علاقے کی چیک پوسٹوں میں کار سے 1.40 کروڑ روپے نقد برآمد ہوئے ہیں۔ ساگر رورل پولیس اسٹیشن علاقہ کی چوکی میں ایک گاڑی میں 20 لاکھ روپے برآمد ہوئے ہیں۔ یہ جانکاری ضلعی پولیس ڈپارٹمنٹ نے صحافیوں کو دی۔اسمبلی انتخابات کی وجہ سے شیموگہ ضلع کے مختلف تعلقہ جات کے علاقوں میں خصوصی چیک پوسٹیں کھولی گئی ہیں۔ ان چیک پوسٹوں پر 24 گھنٹے گاڑیوں کی تلاشی لی جاتی ہے۔اسمبلی انتخابات کے اعلان کے ساتھ ہی ضلع انتظامیہ اور محکمہ پولس کی جانب سے شیموگہ ضلع میں انتخابی ضابطہ اخلاق کو سختی سے نافذ کرنے کی کارروائی کی جارہی ہے۔ ضلع پولیس نے کہا ہے کہ اس دوران شیموگہ کے ڈوڈاپیٹ پولیس اسٹیشن علاقے میں کروڑوں روپے کی ساڑیاں برآمد ہوئی ہیں۔ اسمبلی انتخابات کے اعلان کے بعد پوری ریاست میں اتنی بڑی مقدار میں غیر قانونی ساڑیاں جمع کرنے کا پتہ چلا ہے۔ برآمد شدہ ساڑیوں کی مالیت 4.50 کروڑ روپے ہے۔ اس بارے میں مزید معلومات نہیں مل سکیں۔ ضبط شدہ ساڑیاں 30 ہزار سے زائد ہیں۔ انہیں ایک گودام میں رکھا گیا تھا۔ یہ ساڑیاں کس تاجر کی ہیں، آیا یہ انتخابی مقاصد کے لیے لائی گئی تھیں یا کاروبار کے لیے، وغیرہ کی جانچ کی جا رہی ہے۔شیموگہ شہر کے ونوبا نگر اسٹیشن علاقے میں لاکھوں روپے مالیت کے چاول کی بوریاں بغیر کاغذات کے ٹرکوں میں لاد کر لے جایا جا رہا تھا۔ چاول کے 100 تھیلوں کی مالیت ایک کروڑ 56 لاکھ روپے ہے۔ ایک بوری میں 26 کلو چاول ہوتے ہیں۔ شیموگہ ضلع کے ہر تعلقہ علاقے میں چیک پوسٹیں قائم کی گئی ہیں۔ ضلعی پولیس نے بتایا کہ شیموگہ کے ونوبا نگرکے حدود میں بغیر کاغذات کے چاول لے جانے والے ایک ٹرک کو چاول کے ساتھ ضبط کیا گیا۔
