مسلمانوں کا حق چھین کرلوگوں کو گمراہ کیا جا ر ہا ہے : کما ر سو ا می 

شیموگہ:۔بی جے پی حکومت نے مسلمانوں کا ریزرویشن چھین کر مسلمانوں کے حقوق کو پامال کیا ہے ،ایک طرف بی جے پی مسلمانوں کے ریزرویشن کو ختم کرتے ہوئے لنگایتوں اور وکلیگا سماج کو یہ ریزرویشن دینے کی بات کررہی ہے تو دوسری جانب عدالت میں بی جے پی نے اس بات کی تصدیق کی ہے کہ ریزرویشن کو ہم نے جاری نہیں کیاہے،اس طرح سے بی جے پی ریاست کی عوام کو گمراہ کررہی ہے۔اس بات کااظہار سابق وزیر اعلیٰ ایچ ڈی کمارسوامی نے کیاہے۔ انہوں نے آج شیموگہ میں کانگریس سے جے ڈی ایس میں شامل ہونےوالے مختاراحمد اور ان کے ساتھیوں و حامیوں کا استقبال کرنے کے بعد ہزاروں کے مجموعے سے خطاب کرتے ہوئے کہا کہ اقتدارپر آنے کےبعد مسلمانوں کے ریزرویشن کو نہ صرف بحال کیا جا ئیگا بلکہ اس ریزرویشن میں اضافہ بھی کیاجائیگا، اقلیتوں کوتحفظ فراہم کرنے کیلئے سچر کمیٹی کی سفارشات کو عملی طورپر لاگو کیا جائیگا۔ اس بار ریاست میں جے ڈی ایس کے بغیر کوئی بھی پارٹی حکومت نہیں بنا سکتی،جے ڈی ایس حکومت بنانے میں اہم کردار اداکریگی،جو سروے رپورٹس ہیں وہ بے بنیادہیں،لوگ جے ڈی ایس کے ساتھ میں ہیں۔انہوں نے بتایاکہ اس دفعہ جے ڈی ایس اقتدارمیں آتی ہے تو شیموگہ ضلع سے دو اراکین اسمبلی کو منسٹر بنایاجائیگا۔شیموگہ کی عوام کیلئے یہ بہترین موقع ہے کہ وہ شیموگہ شہرمیں جے ڈی ایس امیدوار آئینورمنجوناتھ کامیاب بنائیں۔انہوں نے عوام کو حق دلانے کیلئے بی جے پی کو چھوڑا ہےاور جے ڈی ایس میں شامل ہوکر شیموگہ کو ترقی یافتہ شہر بنانے کا ارادہ کیاہے،ایسے میں شیموگہ کی عوام ان پر آنکھ بند کرکے کامیاب بنائے ۔شیموگہ میں اسمبلی انتخابات کو لیکر اب تک جتنی ریالیاں ہوئی ہیں اُن میں آج کی ریالی میں جتنی تعداد لوگوں کی تھی وہ کسی اور سیاسی پارٹی کی ریالیوں میں دیکھی نہیں گئی ہے،تقریبادس ہزار سے زائد افرادآج کے اجلاس میں شریک تھے،سب سے اہم بات یہ رہی ہے کہ مختاراحمدکی شمولیت کی اس تقریب میں قریب چار ہزار سے زائد اقلیتی طبقےکے لوگ مختاراحمد کے فلکس اور پلے کارڈ لیکر جلسے میں شامل ہوئے تھے۔اس موقع پر جے ڈی ایس امیدوار آئینورمنجوناتھ،جے ڈی ایس کے ضلعی صدر ایم سری کانت،کے بی پرسنناکمار ، اقلیتی شعبہ کے صدر یوسف بھیا ،ایم سمیع اللہ سمیت متعدد لیڈران موجودتھے۔