جیلوں میں بند روہنگیا کی فریاد، مارچ میں سنے گا سپریم کورٹ

دہلی: سپریم کورٹ نے جمعرات کو اس درخواست پر سماعت کرنے پر اتفاق کیا جس میں حکومت کو جیلوں اور حراستی مراکز میں غیر قانونی طور پر رکھے گئے روہنگیا پناہ گزینوں کو رہا کرنے کی ہدایت کی درخواست کی گئی تھی۔ اس معاملے کا حوالہ دیتے ہوئے وکیل پرشانت بھوشن نے کہا کہ اس معاملے کو سماعت کے لیے نہیں رکھا گیا ہے، جس کے بعد ہی جسٹس بی آر گوائی اور جسٹس سندیپ مہتا کی بنچ نے عرضی پر سماعت کرنے پر رضامندی ظاہر کی۔ سپریم کورٹ نے کہا کہ وہ اس کیس کی سماعت مارچ میں کرے گی۔ عدالت عظمیٰ نے گزشتہ سال 10 اکتوبر کو مرکز کو نوٹس جاری کرتے ہوئے چار ہفتوں کے اندر جواب طلب کیا تھا۔ پرشانت بھوشن درخواست گزار پریالی سور کی طرف سے پیش ہوئے۔ پریالی سور نے درخواست میں کہا کہ روہنگیا میانمار کی ریاست راکھین میں اقلیت ہیں۔اقوام متحدہ نے انہیں دنیا کی سب سے زیادہ ستائی ہوئی نسلی اقلیت قرار دیا ہے۔ درخواست میں کہا گیا کہ روہنگیا پناہ گزین ظلم و ستم سے بچنے کے لیے ہندوستان سمیت ہمسایہ ممالک میں بھاگ گئے۔ سینکڑوں روہنگیا پناہ گزین جن میں حاملہ خواتین اور نابالغ بھی شامل ہیں، ہندوستان کی جیلوں اور حراستی مراکز میں غیر قانونی اور غیر معینہ مدت کے لیے نظر بند ہیں۔