دہلی:۔ سوشل میڈیا پلیٹ فارمز پر مذہبی اشتعال انگیز پوسٹوں کو روکنے کے لئے دائر درخواست پر سپریم کورٹ نے درخواست گزار سے کہا کہ وہ پہلے آئی ٹی کے نئے قواعد پڑھیں اور پھر عدالت کو بتائیں کہ کیا ان قوانین میں اس بارے میں کوئی بندوبست ہے۔ چیف جسٹس (سی جے آئی) ایم وی رمنا کی سربراہی میں بنچ نے درخواست گزار کو آئی ٹی کے نئے قواعد کا مطالعہ کرنے کے لئے ایک ہفتے کا وقت دیا ہے ، دراصل سپریم کورٹ میں ایک درخواست دائر کی گئی ہے ، جس میں سوشل میڈیا پلیٹ فارم سے اسلامو فوبک مواد کو روکنے اور ٹویٹر اور ان صارفین کے خلاف سی بی آئی یا این آئی اے تحقیقات کی ہدایت ددینے کا مطالبہ کیا گیا ہے جو اشتعال انگیز پوسٹس شائع کرنے میں ملوث ہیں۔ درخواست میں اس کے لئے نظام الدین مرکزمیں تبلیغی جماعت کے معاملے کا حوالہ دیا گیا ہے۔درخواست گزار خواجہ اعجازالدین چاہتے ہیں کہ عدالت عظمیٰ نظام الدین میں تبلیغی جماعت کے اجلاس کے بعد اسلام فوبک مواد والے ٹی وی چینلز اور سوشل میڈیا پلیٹ فارم پر پابندی عائد کرے۔ چیف جسٹس نے کہا کہ سوال یہ ہے کہ لوگ پہلے سے ہی اسے بھول رہے ہیں اور آپ اسے زندہ کرنا چاہتے ہیں؟ کیا آپ نے آئی ٹی کے نئے اصول پڑھے ہیں؟ درخواست گزار نے جواب دیا کہ آئی ٹی کے نئے قواعد میں مذہبی امورکا تذکرہ نہیں کیا گیا ہے، چیف جسٹس نے کہا کہ پہلے ہی کچھ درخواستیں زیر التواء ہیں ، ہم یہ دلیل کیوں رکھیں؟ اپنا ہوم ورک کریں۔ ایک ہفتے بعد پورے قانون کی فہرست پڑھ کر آئیں ۔ اس کے ساتھ ہی سپریم کورٹ نے کیس کی سماعت ایک ہفتہ کے لئے ملتوی کردی۔
