ایم ڈی اور ایم ایس کرنے والے ڈاکٹرز لازمی پوسٹنگ کا راستہ تلاش کر رہے ہیں

بنگلورو:۔  ڈاکٹر آف میڈیسن (DM) اور ماسٹر آف سرجری (MS) کورسز مکمل کرنے کے بعد بھی 2018 بیچ کے سینکڑوں ڈاکٹرز لازمی پوسٹنگ کے منتظر ہیں۔ بانڈ کے مطابق پی جی کے بعد ان ڈاکٹروں کے لیے ایک سال کی سروس لازمی ہے۔ ڈاکٹروں کے مطابق محکمہ صحت اور میڈیکل ایجوکیشن ڈپارٹمنٹ نے مناسب طریقے سے کونسلنگ نہیں کی۔ ریاست کے میڈیکل کالجوں میں مخلوعہ پوسٹوں کی فہرست بھی جاری نہیں کی گئی۔ ڈاکٹروں کو نقصان اٹھانا پڑتا ہے۔ مسئلہ حل نہ ہونے کی صورت میں ڈاکٹروں نے قانونی راستہ اختیار کرنے کا انتباہ دیا ہے۔ ڈاکٹروں کے مطابق حکومت، میڈیکل ایجوکیشن اور محکمہ صحت کی غفلت ان کے مستقبل سے کھیل رہی ہے۔ کئی ڈاکٹروں نے میڈیکل ایجوکیشن ڈپارٹمنٹ اور محکمہ صحت پر پوسٹنگ میں کرپشن کا الزام بھی لگایا ہے۔ تاہم حکام نے ان الزامات کو بے بنیاد قرار دیا ہے۔کرناٹک اسوسی ایشن آف ریزیڈنٹ ڈاکٹرس (KAARD) کے مطابق سال 2019 میں سپریم کورٹ کے فیصلے کے بعد پی جی کورسز مکمل کرنے کے بعد لازمی سرکاری پوسٹنگ کے لیے آن لائن رجسٹریشن لازمی ہے۔ سرکاری اسپتالوں یا کالجوں میں ایک سال خدمات انجام دینے کے بعد متعلقہ ڈاکٹر کو سینئر ریزیڈنٹ کہا جائے گا۔محکمہ نے اس سال اگست میں ایک نوٹیفکیشن جاری کیا تھا جس میں ڈاکٹروں سے کہا گیا تھا کہ وہ پوسٹنگ کے لیے آن لائن انتخاب پُر کریں۔ڈ اکٹروں کو ہدایت کی گئی کہ وہ مضمون کے ساتھ چار کالجوں کے نام بھی بھریں۔ پوسٹنگ میرٹ کی بنیاد پر ہونی تھی۔ لیکن اس نوٹیفکیشن کو منسوخ کرتے ہوئے محکمہ نے 4 اکتوبر کو ایک اور نوٹیفکیشن جاری کیا۔ جس کے مطابق 4 سے 10 اکتوبر تک رجسٹریشن ہونا تھی اور 12 اور 13 اکتوبر کو انتخاب ہونا تھا۔ یہ بھی ملتوی کر دیا گیا۔ 25 اکتوبر کو مخلوعہ پوسٹوں کی آدھی ادھوری فہرست جاری کی گئی۔ ڈاکٹروں کو 25 اور 26 اکتوبر کو آن لائن انتخاب بھرنے کا موقع دیا گیا۔اس سب کے باوجود کئی میڈیکل کالجوں میں مضامین وار پوسٹوں کی تعداد صفر تھی۔ ایم ڈی (ڈرماٹولوجی) کے ایک ڈاکٹر نے بتایا کہ کسی کالج میں کوئی پوسٹ نہیں ہے۔ میرٹ لسٹ میں نام آنے کے باوجود ڈاکٹرز پوسٹنگ سے محروم رہے۔ایک متاثرہ ڈاکٹر نے بتایا کہ میڈیکل کالج میں پیتھالوجی، جنرل میڈیسن، جنرل سرجری اور آرتھوپیڈکس کے لیے کافی تعداد میں سیٹیں ہیں۔ لیکن اینستھیزیا، ڈرمیٹالوجی، سائیکالوجی اور پیڈیاٹرک کی سیٹیں بہت کم تھیں۔ ایسے میں ڈاکٹروں کو صرف پرائمری یا کمیونٹی ہیلتھ سینٹرز جانے کا آپشن ملا، جو کہ جائز نہیں۔کرناٹک انسٹی ٹیوٹ آف میڈیکل سائنسز اور بنگلور میڈیکل کالج اینڈ ریسرچ انسٹی ٹیوٹ سمیت کئی میڈیکل کالجوں نے میڈیکل ایجوکیشن ڈپارٹمنٹ اور ہیلتھ کمشنر کو خط لکھ کر آن لائن پورٹل میں بے قاعدگیوں کی شکایت کی ہے۔ کالجوں میں سیٹیں ہونے کے باوجود پورٹل پر تعداد صفر ہے۔AARD کے رکن ڈاکٹر باگے واڑی نے کہا کہ ایک ڈاکٹر جس نے نفسیات میں ایم ڈی کیا ہے نے بتایا کہ میڈیکل ایجوکیشن ڈپارٹمنٹ نے کونسلنگ کے عمل میں فاصلہ رکھا۔ اب رجسٹریشن کے لیے صرف دو دن دیے گئے ہیں۔ مخلوعہ پوسٹوں کی تعداد صفر ہونے کی وجہ سے بہت سے ڈاکٹرز رجسٹریشن نہیں کر پا رہے ہیں۔ مسئلہ حل نہ ہوا تو عدالت سے رجوع کریں گے۔ پرائمری یا کمیونٹی ہیلتھ سینٹرز میں پوسٹنگ پر متعلقہ ڈاکٹر ایک سال کے بعد سینئر ریذیڈنٹ نہیں بن سکے گا۔