وجئے پور:۔کرناٹک میں اگلے سال ہونے والے اسمبلی انتخابات کے لیے پہلے ہی سیاسی چالیں اپنائی جا رہی ہیں۔ ایک طرف بی جے پی نے ریاست کے بڑے لیڈر اور سابق وزیر اعلیٰ بی ایس یڈی یورپا کو پارلیمانی بورڈ میں شامل کیا ہے تو دوسری طرف کرناٹک سے بی جے پی کے سینئرایم ایل اے بسون گوڑا پاٹل یتنال کا بڑا دعویٰ سامنے آیا ہے۔ ایم ایل اے نے کہا ہے کہ اگر پارٹی ان کی قیادت میں 2023 کے اسمبلی انتخابات لڑتی ہے تو وہ آسانی سے 150 سیٹیں جیت لے گی۔ انہوں نے یہ بھی دعویٰ کیا ہے کہ ان میں کرناٹک کا وزیر اعلیٰ بننے کی تمام اہلیت موجود ہے۔وجئے پور شہر کے ایم ایل اے جو ریاست کے مضبوط بی جے پی لیڈر اور سابق وزیر اعلیٰ بی ایس یدی یورپا کے کھلے عام نقاد ہیں، بعد میں انہیں پارلیمانی بورڈ اور مرکزی انتخابی کمیٹی میں ان کی تقرری پر مبارکباد دی،اور اسی سانس میں وزیر اعظم نریندر مودی کے خاندانی سیاست کے خاتمے کے بارے میں دیئے گئے بیانات کو بھی یاد دلایا۔ انہوں نے کہا کہ یدی یورپا کے سنٹرل الیکشن کمیٹی میں جانے کے بعد آپ یتنال کے ٹکٹ کے بارے میں جو چاہیں اندازہ لگا سکتے ہیں لیکن مجھے بھی ٹکٹ ملے گا اور میں اگلا ایم ایل اے ہوں گا۔جب صحافیوں نے ان سے وزیر یا وزیراعلیٰ بننے کے بارے میں پوچھا تو انہوں نے کہا ‘میرے پاس تمام قابلیت ہے۔ اگر میں وزیراعلیٰ کا امیدوار بنتا ہوں تو ہمیں آسانی سے 150 سیٹیں مل جائیں گی (225 رکنی اسمبلی میں)۔ سابق مرکزی وزیر جنہوں نے اس وقت کے وزیر اعظم اٹل بہاری واجپئی کی حکومت میں خدمات انجام دی تھیں، ماضی میں وزیر اعلیٰ بننے کی اپنی خواہش کا اظہار کر چکے ہیں۔اگرچہ مرکزی وزیر داخلہ امیت شاہ نے پہلے ہی واضح کر دیا ہے کہ بی جے پی 2023 کی اسمبلی میں وزیر اعلیٰ بسواراج بومائی کی قیادت میں جائے گی، لیکن یدی یورپا سمیت کئی ریاستی رہنماؤں کے بیانات اب تک یہ بتاتے ہیں کہ پارٹی کے اندر کوئی اتفاق رائے نہیں ہے۔ یہ پوچھے جانے پر کہ کیا پارٹی قیادت میں کسی تبدیلی کے بغیر الیکشن جیتنے کی پوزیشن میں ہے، یتنال نے صرف اتنا کہا کہ پارٹی ہائی کمان کو سب کچھ معلوم ہے اور وہ صحیح وقت پر صحیح فیصلہ کریگی۔
