دہلی:۔ لکھیم پور کھیری معاملے کو لے کر پوری اپوزیشن مرکزی وزیر مملکت برائے داخلہ اجے مشرا ٹینی کے استعفیٰ کا مطالبہ کرنے کے لیے حکومت پر دباؤ ڈال رہی ہے۔ پارلیمنٹ کے سرمائی اجلاس میں اس معاملے کی وجہ سے کارروائی میں خلل پڑ رہا ہے لیکن بی جے پی قیادت وزیر اجے مشرا ٹینی کے خلاف کارروائی کے حق میں نہیں ہے۔ ذرائع نے یہ اطلاع دی۔اجے مشرا کو یونین کونسل آف منسٹرس سے نہیں ہٹایا جائے گا۔ ذرائع سے پتہ چلتا ہے کہ بی جے پی قیادت کی رائے ہے کہ ایس آئی ٹی کی رپورٹ حتمی نہیں ہے اور یہ معاملہ عدالت میں زیر سماعت ہے۔ ویسے بھی باپ کو بیٹے کے اعمال کی سزا نہیں دی جا سکتی۔ صحافیوں کے تئیں اجے مشرا کے رویہ کو یقینی طور پر غلط قرار دیا گیا ہے اور انہیں ہدایت دی گئی ہے کہ آئندہ ایسا واقعہ نہ ہو۔ قابل ذکر ہے کہ لکھیم پور کھیری معاملہ پارلیمنٹ میں حکمراں اور اپوزیشین جماعت کے درمیان تصادم کی ایک نئی وجہ بن گیا ہے۔ اپوزیشن ایس آئی ٹی کی رپورٹ کے بعد وزیر مملکت برائے داخلہ اجے مشرا کے استعفیٰ کا مطالبہ کر رہی ہے۔ رپورٹ میں ان کے بیٹے پر جان بوجھ کر قتل کا الزام لگایا گیا ہے، جب کہ حکومت اب بھی اپنے وزیر کے ساتھ کھڑی ہے۔راجیہ سبھا میں جمعرات کو کانگریس لیڈر ملکارجن کھڑگے نے کہا کہ ٹینی کو استعفیٰ دے دینا چاہیے۔ بدھ کو پارلیمنٹ ہاؤس میں لکھیم پور کیس کی گونج سنائی دی۔ لوک سبھا میں راہل گاندھی نے اس معاملے میں ایڈجسٹمنٹ کا نوٹس دیا تھا، جسے اسپیکر نے مسترد کر دیا۔
