دہلی:۔سنٹرل بورڈ آف سیکنڈری ایجوکیشن (CBSE) نے کلاس 10ویں اور کلاس 12ویں ٹرم 2 کے پریکٹیکل امتحانات کا شیڈول جاری کر دیا ہے۔ پریکٹیکل امتحانات 2 مارچ سے شروع ہوں گے اور تھیوری امتحانات کے شروع ہونے سے 10 دن پہلے ختم ہوں گے۔ سی بی ایس ای بورڈ کے ٹرم 2 کے امتحان 26 اپریل سے منعقد ہوں گے۔ امتحان آف لائن موڈ میں ہو گا۔ پریکٹیکل امتحانات کے دوران بھی اسکولوں کو کورونا پروٹوکول پر عمل کرنا ہوگا۔ CBSE کی طرف سے جاری کردہ نوٹس میں کہا گیا ہے کہ ہجوم اور سماجی دوری سے بچنے کے لیے اسکول طلباء کے گروپ/بیچ کو 10 طلباء کے ذیلی گروپوں میں تقسیم کر سکتا ہے۔ 10ویں جماعت کے ریگولر طلبہ کے لیے داخلی امتحان اسکولوں کے ذریعے لیا جائے گا، جبکہ 12ویں جماعت کے ریگولر طلبہ کا پریکٹیکل امتحان بیرونی ممتحن کے حوالے کیا جائے گا۔ اسکول 2 مارچ سے روزانہ کی بنیاد پر پریکٹیکل امتحان کے نمبر اپ لوڈ کریں گے۔ سی بی ایس ای کی طرف سے جاری کردہ سرکاری نوٹیفکیشن میں کہا گیا ہے کہ نمبروں کی اپ لوڈنگ متعلقہ کلاس کی آخری تاریخ تک مکمل ہو جائے گی۔ بورڈ کی طرف سے تاریخوں میں توسیع پر غور نہیں کیا جائے گا۔
