دہلی:۔سپریم کورٹ اشتعال انگیز تقریر کرنے کے معاملے میں گرفتار جتیندر نارائن تیاگی عرف وسیم رضوی کی ضمانت درخواست پر 17 مئی کو سماعت کرے گا۔ سپریم کورٹ نے جمعرات کو معاملہ درج کیا۔ دراصل وسیم رضوی کو 13 جنوری کو ہریدوار میں منعقدہ دھرم سنسد میں اشتعال انگیز تقریر کرنے پر گرفتار کیا گیا تھا۔مذہب تبدیل کرکے ہندو بننے والے تیاگی پر الزام ہے کہ اس نے ہریدوار میں منعقدہ دھرم سنسد میں اسلام اور پیغمبر اسلام کے خلاف قابل اعتراض تقریر کی تھی۔ سپریم کورٹ نے اس معاملے میں اتراکھنڈ حکومت کو بھی نوٹس جاری کیا ہے۔اس سے قبل ہائی کورٹ نے ہریدوار میں منعقدہ دھرم سنسد میں اشتعال انگیز تقاریر کرنے کے معاملے میں دائر جتیندر نارائن تیاگی عرف وسیم رضوی کی ضمانت کی درخواست مسترد کر دی تھی۔ اس کے بعد اس نے سپریم کورٹ کا رخ کیا۔ دراصل شکایت کنندہ ندیم علی نے 2 جنوری 2022 کو ہریدوار کوتوالی میں شکایت درج کروائی تھی کہ ہریدوار میں 17 سے 19 دسمبر تک دھرم سنسد کا انعقاد کیا گیا تھا۔ اس میں اشتعال انگیز تقاریر کی گئیں اور قابل اعتراض الفاظ کا استعمال کیا گیا۔ جتیندر نارائن تیاگی، یتی نرسمہانند اور دیگر نے بعد میں اس کا ویڈیو بنایا اور اسے وائرل کیا۔
