بیرون ملک جانے والوں کو جعلی ایجنٹوں سے بچانے کیلئے نیا بل لائے گی سرکار

دہلی:۔ وزیر خارجہ ایس جے شنکر نے جمعرات کو کہا کہ حکومت جلد ہی ایک نیا بل لائے گی تاکہ روزگار کے لیے بیرون ملک جانے والے ہندوستانی شہریوں کوایجنٹوں کی دھوکہ دہی سے بچایا جا سکے۔جے شنکر نے راجیہ سبھا میں ضمنی سوالات کے جواب میں یہ جانکاری دی۔انہوں نے کہا کہ وزارت خارجہ موجودہ ایمیگریشن ایکٹ 1983 کے دائرہ کار کو وسعت دینے کے لیے ایک نیا قانون متعارف کرانے کے عمل میں ہے۔انہوں نے کہا کہ یہ قانون دلچسپی رکھنے والے نوجوانوں کی محفوظ اور قانونی نقل مکانی کو فروغ دینے اور انہیں غیر قانونی طور سے بھرتی کرنے والے ایجنٹوں کے دھوکہ دہی سے بچانے میں مدد دے گا۔جے شنکر نے کہا کہ وزارت خارجہ نے نئے امیگریشن بل کا مسودہ تیار کرنے کا عمل شروع کر دیا ہے۔ انہوں نے کہا کہ پہلے ریکروٹمنٹ ایجنٹس اور ایجنسیاں بنیادی طور پر بڑے شہروں میں مرکوز تھیں، جو نوجوانوں کے غیر قانونی چینل کا شکار ہونے کی سب سے بڑی وجہ تھی۔انہوں نے کہا کہ اسے مقامی بنانے پر زور دیا گیا ہے اور دیہی ہندوستان میں رہنے والے نیم خواندہ نوجوانوں کو رجسٹریشن کی ترغیب دینے کے لیے چھوٹے شہروں، قصبوں اور دور دراز دیہاتوں سے ایجنٹوں کو بھرتی کرنے کی سہولت فراہم کرنے کے لیے ایک نئی اسکیم شروع کی گئی ہے۔وزیر خارجہ نے کہا کہ یہ اسکیم نئے کاروباریوں کے ساتھ ساتھ چھوٹے اداروں کو بیرون ملک روزگار کے میدان میں کاروباری مواقع فراہم کرے گی ،جو پہلے سے ہی ٹریول کنسلٹنسی، سفر اور سیاحت جیسی متعلقہ سرگرمیوں میں مصروف ہیں۔انہوں نے کہا کہ دسمبر 2017 میں اس کے آغاز کے بعد سے کل 557 نئے ریکروٹنگ ایجنٹس کو رجسٹر کیا گیا ہے اور اس سے فائدہ اٹھایا گیا ہے۔جے شنکر نے کہا کہ فرانس اور برطانیہ کے درمیان بھی ہجرت اور نقل و حرکت کے معاہدے ہیں، جو نقل مکانی اور نقل و حرکت سے متعلق امور پر تعاون کے لیے جامع بنیادی ڈھانچہ فراہم کرتے ہیں۔انہوں نے کہا کہ ہندوستانی مزدوروںکی بھرتی کے لیے ستمبر 2021 میں پرتگال کے ساتھ ایک معاہدہ کیا گیا تھا۔