دہلی :۔اکھل بھارتیہ ہندو مہاسبھا (اے بی ایچ ایم) نے ہندوستانی کرنسی پر مہاتما گاندھی کے بجائے نیتا جی سبھاش چندر بوس کی تصویر چھاپنے کا مطالبہ کیا ہے۔ہندو مہاسبھا کا استدلال ہے کہ جدوجہد آزادی میں نیتا جی کا تعاون بابائے قوم سے کم نہیں تھا۔ ذرائع کے مطابق مغربی بنگال میں ہندو مہاسبھا کے ورکنگ صدر چندر چوڑ گوسوامی نے جمعہ کو یہ باتیں کہیں۔ انہوں نے کہا کہ یہ نیتا جی سبھاس چندر بوس کو عزت دینے کا بہترین طریقہ ہے۔ گوسوامی کے مطابق ہندوستانی کرنسی پر گاندھی جی کی تصویر کو نیتا جی کی تصویر سے بدلنا چاہیے۔اس پر ترنمول کانگریس (ٹی ایم سی) اور کانگریس قائدین کو تنقید کا نشانہ بنایا۔ ان پارٹیوں کا ماننا ہے کہ اس سب کے پیچھے بی جے پی کا ہاتھ ہے۔ بی جے پی کو بنگال میں تقسیم کی سیاست بند کرنی چاہیے۔ کانگریس لیڈر ادھیر رنجن چودھری نے کہا کہ ملک کی آزادی میں گاندھی جی کا اہم رول تھا۔ ہم سب جانتے ہیں کہ بابائے قوم کے قتل کے پیچھے کس کا ہاتھ تھا۔ انہوں نے کہا کہ گاندھی جی کے آدرشوں کو روز مارا جا رہا ہے۔گوسوامی نے مغربی بنگال میں ہونے والے پنچایتی انتخابات لڑنے کا فیصلہ کیا ہے۔ انہوں نے کہا کہ ریاست میں روزانہ ہندو بنگالیوں پر حملے ہو رہے ہیں۔ نہ ٹی ایم سی اور نہ ہی بی جے پی ان کی حفاظت کرنے کے قابل ہے۔ ہم ان کے حقوق کے لیے لڑیں گے۔ گوسوامی نے کہا کہ بی جے پی نے بنگال کی تقسیم کا مطالبہ کیا ہے، ہم اس کی حمایت نہیں کرتے۔ ہم ریاست کو مضبوط بنانے کے لیے کام کریں گے۔ اسی وقت، بی جے پی کے ریاستی ترجمان سمیک بھٹاچاریہ نے کہا کہ پارٹی ووٹروں کو کسی خاص برادری یا مذہب کے نظریے سے نہیں دیکھتی ہے۔حال ہی میں کولکتہ کے ایک درگا پنڈال میں مہیشاسور کے بجائے گاندھی جی کو دکھایا گیا، جس کی وجہ سے کافی ہنگامہ ہوا۔ یہ پوجا پنڈال خود اکھل بھارتیہ ہندو مہاسبھا نے بنایا تھا۔ ٹی ایم سی، بی جے پی، سی پی آئی-ایم اور کانگریس سمیت تمام سیاسی جماعتوں نے اس پر تنقید کی۔ تاہم بعد میں مجسمے کو تبدیل کر دیا گیا۔ اس تنازعہ پر گوسوامی نے کہا کہ مہیشسور کے طور پر گاندھی جی کی تصویر کشی غیر ارادی تھی۔
