بنگلورو:۔ملک بھر میں کوویڈ۔19 کے معاملات میں تازہ اضافہ کے پیش نظر، کرناٹک حکومت نےکوویڈ19 ایڈوائزری جاری کی ہے۔ اس کے مطابق 60 سال سے زائد عمر کے افراد، دیگر بیماریوں میں مبتلا افراد، حاملہ خواتین اور دودھ پلانے والی ماؤں کو باہر نکلتے وقت فیس ماسک پہننا چاہیے۔ لوگوں کو بند، ناقص ہوادار جگہوں اور بھیڑ والی جگہوں پر جانے سے سختی سے گریز کرنا چاہیے۔ ریاست کی یہ ایڈوائزری مرکز کی طرف سے جاری کردہ ایڈوائزری کے ایک دن بعد آئی ہے۔کیرالہ میں JN.1 کوویڈ سب ویرینٹ کا پتہ چلنے کے بعد گزشتہ چند دنوں میں کوویڈایڈوائزریز اور اقدامات پر زیادہ توجہ دی گئی ہے، جو ہندوستان میں اس طرح کا پہلا کیس ہے۔ وزیر صحت دنیش گنڈو راؤ نے صحافیوں سے کہا کہ کسی کو پریشان ہونے کی ضرورت نہیں ہے۔ ہم نے پرسوں ایک میٹنگ کی تھی اور کل ہماری ٹیکنیکل ایڈوائزری کمیٹی کا اجلاس ڈاکٹر (کے) روی کی صدارت میں ہوا۔ ہمارے حکام اور ماہرین کے درمیان روک تھام کے اقدامات کے بارے میں بات چیت ہوئی۔ فی الحال پڑوسی ریاست کیرالہ سے لوگوں کی نقل و حرکت پر کوئی پابندی نہیں ہے۔دریں اثنا، مرکزی حکومت نے نئی ذیلی قسم JN.1 کے بارے میں خدشات پر تمام ریاستوں اور مرکز کے زیر انتظام علاقوں کو ایک ایڈوائزری جاری کی ہے۔ ریاستوں سے کہا گیا ہے کہ وہ تمام صحت کی سہولیات میں ضلع وار انفلوئنزا جیسی بیماری (ILI) اور شدید سانس کی بیماری (SARI) کے معاملات کی نگرانی کریں اور رپورٹ کریں۔ کرناٹک کی ایڈوائزری نے کیرالہ اور تمل ناڈو کی سرحد سے متصل اضلاع کے عہدیداروں سے کہا ہے کہ وہ چوکس رہیں اور کووڈ کیسز کی مناسب جانچ اور بروقت رپورٹنگ کو یقینی بنائیں۔بند، خراب ہوادار جگہوں اور ہجوم والی جگہوں سے سختی سے پرہیز کریں۔صحت اور خاندانی بہبود کی خدمات کے کمشنر رندیپ ڈی کے ذریعہ جاری کردہ کرناٹک ایڈوائزری میں کہا گیا ہے کہ ملک میں کوویڈ۔19 کی تازہ ترین صورتحال اور JN.1 ذیلی قسم کے پیش نظر تمام اقدامات پر عمل کرنے کا مشورہ دیا جاتا ہے۔ اس میں کہا گیا ہے کہ تمام بوڑھے (60 سال یا اس سے زیادہ)، بیمار (خاص طور پر جو گردے، دل، جگر کے امراض وغیرہ میں مبتلا ہیں)، حاملہ خواتین اور دودھ پلانے والی ماؤں کو باہر نکلتے وقت چہرے کے ماسک ضرور پہننا چاہیے۔ بند، خراب ہوادار جگہوں اور ہجوم والی جگہوں پر جانے سے سختی سے گریز کریں۔
