بنگلورو: (انقلاب نیوزبیورو):۔میسورو کے ننجنگڈ میں ایک مندر کے انہدام کے بعد تنازع کے پیش نظر حکومت نے فی الوقت ایسے مندروں کے انہدام پر پابندی لگا دی ہے۔ درحقیقت سال 2009 میں سپریم کورٹ نے ریاستی حکومتوں کو حکم دیا تھا کہ وہ ایک واضح پالیسی بنائیں اور عوامی مقامات پر بنائے گئے غیر قانونی مذہبی مقامات کو ہٹانے اور تبدیل کرنے کے لیے کارروائی کریں۔وزیر ریونیو آر اشوک نے کہا کہ حکومت اس سلسلے میں فیصلہ کرے گی اور ضلعی انتظامیہ سے کہا جائے گا کہ وہ جلد بازی میں اس طرح کے مذہبی ڈھانچے کو نہ گرائے۔ ننجنگود میں مندر کے انہدام سے لوگوں کے مذہبی جذبات مجروح ہوئے ہیں، جس پر انہوں نے وزیر اعلیٰ سے بات بھی کی ہے۔ ضلعی انتظامیہ کو ایسے مذہبی ڈھانچے کو مسمار کرنے سے پہلے مقامی لوگوں کو اعتماد میں لینا چاہیے جو کہ اعلیٰ عدالت کے حکم میں بھی بیان کیا گیا ہے۔انہوں نے کہا کہ سپریم کورٹ کی طرف سے دیا گیا پہلا آپشن اس طرح کے مذہبی ڈھانچے کو تبدیل کرنا تھا۔ گزشتہ 10-12 سالوں سے ضلعی انتظامیہ عوامی مقامات پر بنائے گئے مذہبی ڈھانچے پر سپریم کورٹ کے حکم پر عمل درآمد کر رہی ہے۔ لیکن لوگوں کے جذبات سب سے اہم ہیں۔ دوسری جانب میسورو ڈسٹرکٹ ڈپٹی کمشنر نے کہا کہ چونکہ معاملہ عدالت کے روبرو زیر سماعت ہے، اس لیے وہ اس پر کچھ نہیں کہیں گے، لیکن ریاستی حکومت جو بھی ہدایت دے گی اس پر عمل کیا جائے گا۔دریں اثناء جے ڈی ایس لیڈر ایچ ڈی کمار سوامی نے کہا کہ بی جے پی حکومت ننجنگڈ میں مندر کے انہدام کی ذمہ دار ہے۔ بی جے پی عوام کی توجہ ہٹانے کے لیے دوہری چال کھیل رہی ہے۔ حکومت اور تنظیم کی جانب سے مختلف کام کیے جا رہے ہیں۔ حکومت کی ذمہ داری ہے کہ وہ سپریم کورٹ کے حکم کو اس کے حقیقی معنوں میں بیان کرے اور اس پر عمل درآمد کرے۔
