دہلی:۔تقریباً 800 ہندو خاندان پاکستان میں ہونے والے مظالم سے بچنے کیلئے ہندوستان آئے۔ 2011 میں کانگریس کی قیادت والی یو پی اے حکومت نے پاکستان میں رہنے والے لوگوں کو طویل مدتی ویزا (ایل ٹی وی) دینے کا فیصلہ کیا تھا جنہیں مذہبی ظلم و ستم کا سامنا تھا۔ اس دوران ہندو اور سکھ برادریوں کے سینکڑوں لوگ ہندوستان آچکے تھے۔ ایک دہائی گزرنے کے بعد بھی ان لوگوں کو ہندوستانی شہریت نہیں مل سکی، حالانکہ اس نے شہریت حاصل کرنے کے لیے سرکاری دفاتر کے بہت چکر لگائے لیکن بات نہیں بنی۔ 8 سو ہندو خاندان پاکستان واپس جانے پر مجبور ہوئے۔ یہ دعویٰ ہندوستان میں پاکستانی اقلیتی مہاجرین کے حقوق کے لیے آواز اٹھانے والی تنظیم فرنٹیئر لوک سنگٹھن (ایس ایل ایس) نے کیا ہے۔ بی جے پی کے سینئر لیڈر سبرامنیم سوامی نے اس معاملے پر کہا کہ یہ مرکزی حکومت کے لیے شرم کی بات ہے۔سبرامنیم سوامی نے پیر کو اپنے ایک ٹویٹ میں لکھاکہ یہ بی جے پی کی مرکزی حکومت کے لیے کتنی شرم کی بات ہے۔ ہندوستانی شہری بننے کی امید میں یہاں آئے انسانی حقوق کی خلاف ورزیوں کے تقریبا 800 متاثرین سی اے اے پر مودی حکومت کی عدم کارروائی سے دھوکہ کھا گئے ہیں۔ بہت افسوس ہوا وہ پاکستان واپس چلے گئے۔ راجستھان میں فرنٹیئر لوک سنگٹھن نے کہاکہ ان لوگوں نے شہریت حاصل کرنے کے لیے بہت کوششیں کی تھیں۔ شہریت کے لیے درخواست دی گئی تھی۔ اس کے بعد جب اس معاملے میں کوئی پیش رفت نظر نہ آئی تو وہ پاکستان واپس لوٹنے پر مجبور ہو گئے۔ فرنٹیئر لوک سنگٹھن کے مطابق یہ لوگ سال 2021 میں واپس آئے تھے۔
