وارانسی:۔ وارانسی ڈسٹرکٹ کورٹ میں جمعہ کو اس بات پر سماعت ہوئی کہ آیا سروے رپورٹ اور ویڈیو گرافی کو عام کیا جانا چاہئے؟۔ اس موضوع پر ہندو اور مسلم دونوں جماعتوں کی رائے مختلف تھی۔ گیانواپی مسجد کمیٹی نے عدالت سے درخواست کی ہے کہ سروے کی تصاویر اور ویڈیوز کو عام کرنے کی اجازت نہ دی جائے۔ دوسری طرف ہندو فریق نے اس کی مخالفت کی۔ سروے اور ویڈیو گرافی کی رپورٹ 30 مئی کو فریقین کو پیش کی جائے گی۔سماعت کے بعد مسلم فریق کے وکیل معراج الدین صدیقی نے کہا کہ ہم نے درخواست کی ہے کہ کمیشن کی رپورٹ، تصاویر اور ویڈیوز کو صرف متعلقہ فریقوں کے ساتھ شیئر کیا جائے اور اسے عام نہ کیا جائے۔ سروے میں دعویٰ کیا گیا ہے کہ گیانواپی مسجد میں مندر کے کئی مبینہ ثبوت ملے ہیں۔ وہیںوارانسی کی عدالت میں اس معاملہ کی اگلی سماعت اب 30 مئی کو ہوگی۔دوسری جانب ہندو فریق کے وکیل سبھاش نندن چترویدی نے کہا کہ ویڈیو گرافی کی تصدیق شدہ کاپی آج موصول ہونی تھی۔ لیکن بتایا گیا کہ تکنیکی رکاوٹوں کی وجہ سے سی ڈی نہیں بنائی گئی۔ انہوں نے کہا ہے کہ 30 مئی کو تمام وکلا کو عدالت میں سی ڈی مل جائے گی۔غور طلب ہے کہ گیانواپی مسجد کے معاملہ میں کل وارانسی کورٹ میں بھی سماعت ہوئی تھی۔ اس دوران مسلم فریق نے عرضی کو خارج کرنے کا مطالبہ کیا تھا۔ گیان واپی مسجد تنازعہ کیس میں ٹرائل ہوگا یا نہیں، اس کی سماعت ہونی ہے۔ جمعرات کی سماعت میں عدالت کے اندر عبادت کے مقامات ایکٹ پر بھی بحث ہوئی۔ مسلم فریق نے اس عرصے کے دوران 1991 کے ایکٹ کا حوالہ دیا۔دوسری جانب مسلم فریق نے خدشہ ظاہر کیا کہ شیولنگ کا وجود صرف الزام ہے، ابھی تک یہ الزام ثابت نہیں ہوسکا ہے۔ مسلم فریق نے کہا کہ افواہوں کی وجہ سے عوامی بے چینی پھیلتی ہے، اس لئے اس کی اجازت نہیں دی جانی چاہیے۔ سماعت کے بعد ہندو فریق کے وکیل وشنو جین نے بتایا کہ آج مسلم فریق نے بحث شروع کی ہے، ان کی سماعت ابھی مکمل نہیں ہوئی۔ پیر کو دوپہر 2 بجے سے دوبارہ بحث ہوگی۔ ہم پیر کو اپنا موقف پیش کریں گے۔ مسلم فریق پیر کو بحث شروع کرے گا۔ہندو فریق کے وکیل وشنو شنکر جین نے ڈسٹرکٹ جج کو مطلع کیا کہ گیان واپی مسجد کے اندر پائے جانے والے مبینہ شیولنگ کو نقصان پہنچایا گیا ہے۔
