منگلورو:۔ جمعہ کو، کرناٹک کے اڈپی شہر میں واقع ایک پیرامیڈیکل کالج کے ٹوائلیٹ میں ایک طالبہ کی مبینہ ویڈیو ریکارڈنگ کے معاملے میں ادارے کی تین ملزم لڑکیوں کو مقامی عدالت سے پیشگی ضمانت مل گئی۔ اُڈپی کے مالپے پولیس اسٹیشن میں درج ایف آئی آر میں تین طالبات شبناز، الفیہ اور علیمہ کو نامزد کیا گیا ہے۔ تعزیرات ہند کی دفعہ 509، 204، 175، 34 اور انفارمیشن ٹیکنالوجی ایکٹ کی دفعہ 66 (ای) کے تحت درج ایف آئی آر میں کالج انتظامیہ کو بھی ملزم بنایا گیا ہے۔26 جولائی کو پولیس نے ایک بیان جاری کیا تھا جس میں کہا گیا تھا کہ ازخود نوٹس لیتے ہوئے نیترا جیوتی انسٹی ٹیوٹ آف الائیڈ ہیلتھ سائنسز کے ٹوائلٹ میں ویڈیو ریکارڈنگ کے سلسلے میں دو الگ الگ معاملے درج کیے گئے ہیں۔ انہوں نے بتایا کہ طالبہ کی پرائیویٹ ویڈیو ریکارڈ کرنے اور بعد میں ڈیلیٹ کرنے پر تین طالبات اور کالج انتظامیہ کے خلاف ایف آئی آر درج کی گئی ہے۔پولیس نے واقعے سے متعلق معلومات اور شواہد فراہم کرنے میں ناکامی پر ان کے خلاف مقدمہ درج کرلیا ہے، جس کی وجہ سے متاثرہ کی ساکھ کو نقصان پہنچ سکتا ہے۔ بیان کے مطابق واقعے کی ویڈیو مبینہ طور پر ون انڈیا کنڑ یوٹیوب چینل پر اپ لوڈ کی گئی تھی۔ کالو سنگھ چوہان نامی شخص نے بھی اپنے ٹوئٹر ہینڈل سے مذکورہ ویڈیو کو ٹویٹ کیا۔ ملزم کے خلاف فرقہ وارانہ انتشار پیدا کرنے اور سماجی ہم آہنگی کو نقصان پہنچانے کا مقدمہ بھی درج کیا گیا ہے۔کالج انتظامیہ نے تینوں ملزم طالبات کو معطل کر دیا ہے۔ یہ معاملہ بھی سیاسی رنگ لے چکا ہے۔ ریاست کی مرکزی اپوزیشن بھارتیہ جنتا پارٹی (بی جے پی) نے ایک ہندو لڑکی کی فلم بنانے کے الزام میں تین مسلم طالبات کی گرفتاری کا مطالبہ کرتے ہوئے ریاست گیر احتجاج کا اعلان کیا تھا۔ قومی کمیشن برائے خواتین کی رکن خوشبو سندر نے بھی اس واقعہ کو انتہائی افسوسناک قرار دیا تھا۔
