ریاض:۔ حرمین انتظامیہ کے تحت دینی امور کی انتظامیہ نے کہا ہے کہ مسجد الحرام کے امام و خطیب شیخ ماہر المعیقلی یوم عرفہ کا خطبہ دیں گے۔سبق ویب سائٹ کے مطابق حرمین شریفین انتظامیہ نے کہا ہے کہ شیخ ماہر المعیقلی کے حوالے سے شاہی منظوری آگئی ہے۔انتظامیہ نے کہا ہے کہ ایوان شاہی نے شیخ ماہر المعیقلی کو یوم عرفہ کا خطبہ دینے کی ذمہ داری تفویض کی ہے۔واضح رہے کہ تیسری سعودی ریاست کے دور میں گزشتہ ایک سو سال کے دوران 15 خطیبوں نے یوم عرفہ کا خطبہ دیا ہے۔عرفات میں واقع مسجد نمرہ میں سب سے زیادہ خطبہ دینے والے سعودی عرب کے مفتی اعظم شیخ عبد العزیز آل الشیخ ہیں جنہوں نے 34 مرتبہ خطبہ دیا ہے۔دوسرے نمبر پر شیخ عبد اللہ بن حسن آل الشیخ ہیں جنہوں نے مسلسل 25 سال تک عرفہ کا خطبہ دیا ہے ۔ گزشتہ سال سربرآوردہ علما بورڈ کے رکن شیخ ڈاکٹر یوسف بن محمد بن سعید نے خطبہ عرفہ دیا تھا۔علاوہ ازیں گورنر مدینہ منورہ شہزادہ سلمان بن سلطان بن عبدالعزیز سے دینی امور کی انتظامیہ کے سربراہ شیخ عبدالرحمن السدیس نے ملاقات کی ہے۔ایس پی اے کے مطابق ملاقات میں شیخ عبدالرحمن السدیس نے حج 2024 کے لیے آپریشنل پلان اور اس کے مقاصد کے بارے میں آگاہ کیا۔
